* A Enzo y a Elsa xúnelos dalgo más que l’amor ente pá y fía: l’amor a la mar, el so sustentu y la so pasión.
El venceyu fuerte de Xixón col Cantábricu amuésase en munchos aspeutos. Ye’l nuestru horizonte, el nuestru bálsamu, el nuestru parque de recréu... y el nuestru trabayu.
Enzo vive del Cantábricu y de lo que saca d’él. Un trabayu duru, pero mui guapu. Como elli, munchos otros: Sara, Diego, Abdou y David tamién se dediquen a la pesca y nun lo cambien por nada.
Nun sabemos si esti mou de vida va mantenese munches xeneraciones, pero val con conocer a Elsa, la fía d’Enzo, pa decatase de que, a lo menos, tenemos a una candidata perbona.
Toos ellos faen honor al 3er principiu de la Xixonomía, que postuló Ohm con arrogancia pa nós: “La intensidá de la corriente ye direutamente proporcional al valor de la resistencia”.
Yá seyas principiante, aficionáu/ada o espertu/a, equí tienes una montonera d’actividaes pa disfrutar de la mar de forma activa: surf, vela, kayak, paddle surf, moto d’agua, flyboard, windsurf... Que vas pasalo bien ta asegurao.
El Musel ye’l puertu de Xixón. Ún de los más importantes del Arcu Atlánticu y el más grande d’España nel tráficu de graneles.
Nel Muelle del Rendiellu tán les instalaciones pesqueres: la rula de pescáu, talleres y cetárees con venta al públicu.
Nun se pesca namás en barcu. Ye mui normal atopar a xente prauticando la pesca deportiva con caña nos muelles, nel puertu deportivu, nos pedreros... Si te gusta la pesca, de xuru qu’alcuentres el to requexín perfeutu.
Qu’en Xixón se come de mieu sábelo tol mundu. Y lo que nos ofrez el Cantábricu ye too ello bárbaro. Nun dexes de probar los oricios, les parroches, el centollu, la llubina o cualesquiera de los pescaos y mariscos frescos que vas atopar nes sidreríes y restaurantes de la ciudá.
En barcu, en coche o en cualesquier otru mediu de tresporte puedes llegar nun momentín a pueblos pesqueros asturianos únicos dafechu. No puedes dexar d’averate a Lluanco, Llastres, Tazones, L.luarca, Puertu Vega, Cuideiru y tantos otros...
Talamente nel centru de la ciudá podemos disfrutar d’estampes como esta, onde les embarcaciones de recréu tán al abellugu y onde vas poder arrendar un barcu o contratar paseos turísticos pa disfrutar de Xixón dende la mar.
Vivir bien tien la so ciencia
